Vorto
de la Federacia Prezidanto,
Jan. 2006
 JEN
finiĝas la jaro 2005, dum kiu svarmis agadoj kaj aranĝoj
en nia nordfrancia movado. Unue kaj ĉefe, tiun jaron stampis
la internacia renkontiĝo Boulogne 2005,
kiu memorfestis la centjariĝon de la unua Universala Kongreso
de Esperanto en Bulonjo-ĉe-Maro : kiom da tempo kaj da
energio por organizi ĝin ! kaj kiom sukcesa ĝi estis !
Des pli ke ĝin honorigis la eldono de la albumo Tinĉjo
en Tibeto dank' al la laboro de Hervé Gonin, de Michel
Dechy kaj liaj amikoj : gratulon al ili pro tiu iniciato kaj
ties nekontestebla sukceso !
Krome, nia Federacio vidis plurajn aliajn realigojn
dum 2005. En Februaro malfermiĝis nia nova retejo, kiu belaspekte
disponigas pri multegaj informoj pri la Federacio, la lokaj kluboj
kaj la regionaj aranĝoj. Ĝin vizitas po ĉ. 1000 homoj ĉiumonate !
Fine de Junio sukcese okazis la regiona ekzamensesio en Bersée
laŭ nova sistemo, kiun ni starigis interkonsente kun FEI :
la Federacio mem ricevas ĉiujn rezultojn kaj diplomojn, kaj tiel
povas tuj statistiki kaj plusendi la rezultojn al ĉiu ekzamenito
kun gratulletero.
La ĉi-jara Rendevuo de Morbecque kontentige
disvolviĝis dank' al la kutima agrabla etoso, la koncerto de la
juna Fabrice Morandeau kaj la prelego de Michel Dechy pri Tinĉjo
en Esperanto. Kaj tre bona kaj interesa estis la Zamenhof-festa
aranĝo en Arras (kunorganizita de la Federacio kaj de Arras-Espéranto),
kiu ĉefe konsistis el la prelego de Willy Koukouvi pri Afriko kaj
Esperanto. Intertempe, okaze de sia kunsido la 20an de Novembro,
la Federacia Komitato siasine kreis kvar konstantajn komisionojn
— pri regiona kunordigado, pri komunikado, pri instruado kaj
ekzamenoj kaj pri kulturo kaj aranĝoj.
Kiel mi diris en Morbecque, post du jaroj, nome
en 2008, nia Federacia iĝos centjara : jen datreveno
prifestinda (kaj -enda) ! Por taŭge festi tion, la Komitato
taskis la komisionon pri kulturo kaj aranĝoj pripensi kaj (meze
de 2006) prezenti proponojn pri la formo kaj la enhavo de la « centjariĝa
kongreso » de 2008. Cetere, la Federacio ankaŭ decidis
honorigi tiun centjariĝon per la verkado de la historio de nia Federacio
kaj ties eldono : tial, kreiĝis « speciala komisiono
por la verkado de la historio de la Federacio ». Mi invitas
ĉiujn interesitojn kontakti min por scii pli kaj/aŭ partopreni la
laborojn de la speciala komisiono !
Pli proksime, baldaŭ okazos la federacia kongreso
de 2006. Kun granda ĝojo ni eksciis pri la stariĝo de nova Esperanto-klubo
en Oignies (Pas-de-Calais) dank' al la klopodoj de Michel Carton.
Gratulon kaj longan vivon al la klubo ! Por emfazi tiun naskiĝon,
la Federacio decidis, ke la venonta federacia kongreso okazos en
Oignies dimanĉon la 2an de Aprilo 2006. Mi esperas la partoprenon
de plejan multon da federacianoj ! Pli da informojn vi poste
trovos i.a. en la retejo.
Fine... jes, fine (ĉar mi lasu al vi tempon
por legi la ceteron de la numero !), mi sincere kaj tutkore
deziras al vi, karaj gefederacianoj, karaj geamikoj, bonfarton,
sukceson kaj prosperon dum la tuta jaro 2006. Feliĉajn jarfinajn
festojn ! 
|
