Mi
Kandidatas al FEI
 Esperantistiĝinte
en 1999, de tiam aktiva en la Esperanto- movadoj, mi nun estas
prezidanto de la Nordfrancia
Esperanto-Federacio kaj komitatano de la Unuiĝo
Franca por Esperanto (UFE). Pasiiĝinte pri la lingvo, mi
akiris la ateston pri kapableco (pedagogia fako) en 2005. Mi ĉiam
interesiĝas pri la diversaj movadaj kampoj, kaj provas laŭeble
kontribui en tiuj kaj aliaj aferoj por progresigi niajn celojn por
Esperanto.
Inter tiuj kampoj estas tiu de instruado kaj ekzamenado. Instruado
kompreneble estas unu el niaj bazaj kaj ĉefaj agadoj. Sed ankaŭ
ekzamenado tre gravas. Ekzamenoj ebligas — kiel mejloŝtono
fine de lernjaro — al niaj ekzamenatoj taksi sian lingvokapablon,
sed ili ebligas ankaŭ al ni asociestroj kaj aktivuloj iom post
iom konsistigi diplomitaron iam montreblan al la ministrejo pri
edukado kadre de nia landa kampanjo por Esperanto kiel oficiala
instrufako.
 Pri
la difino kaj organizo de la Esperanto-ekzamenoj en Francio zorgas
la Franca
Esperanto-Instituto. Ĝi estas komuna strukturo de UFE
kaj SAT-Amikaro.
Du celojn ĝi havas : atenti kaj rimarkigi pri bona lingvouzo,
sed precipe organizi la ekzamenojn kaj aljuĝi la respondajn
diplomojn. Ĝin konsistigas 15 membroj : sep elektitaj
de UFE, kvin de SAT-Amikaro kaj tri alelektitaj de la ceteraj membroj.
Okaze de la landa kongreso en Bourg-en-Bresse (Ain), dimanĉon la
27an de Majo 2007, UFE renovigos siajn reprezentantojn en FEI. Jen
kial tiukadre mi nun anoncas mian kandidatecon al FEI-membreco.
Mi estas prezidanto de tiu federacio, kiu jam de 2003 sukcese organizas
ĉiujunie tutregionan
ekzamensesion kun la unuaj tri gradoj. Sekve mi plurjare kunlaboris
rekte kun FEI, mi spertas pri loka organizo de ekzamenoj, kaj dume
rimarkis taŭgaĵojn kaj misaĵojn en la FEI-sfero.
Se UFE elektos min membro de FEI, mi strebos labori i.a. pri :
- pli neta, belaspekta kaj profesieca enpaĝigo de la ekzamenfolioj
senditaj al la lokaj organizantoj kaj ekzamenatoj ;
- ĉiujara ellaboro de tute novaj ekzamentaskoj ;
- pli ofteco de la FEI-kunsidoj (po almenaŭ unu en jaro)
por ebligi la ĉi-antaŭan punkton ;
- publika disponigo pri la antaŭjaraj ekzamentaskoj ;
- disponigo al la lokaj organizantoj (precipe federacioj) pri
la listo de kapableculoj por konsistigo de ekzamenĵurio ;
- kongruigo de la francaj Esperanto-ekzamenoj kun la eŭropaj
ekzamenniveloj ;
- regula kaj kontentiga komunikado : al UFE kaj SAT-Amikaro
pri siaj jaraj agadoj kaj financo ; al la publiko per belaspekta
kaj riĉa retejo.
Pluraj homoj — inkl. membroj de FEI — parolis pri iomaj
malordo kaj malklaro en FEI kaj ĝia organizo. Mia celo estos,
kun la ceteraj membroj de FEI, igi la Instituton videbla, klara
kaj efika sur siaj kampoj. 
Vidu la artikolon en PDF-versio
| 1.
MICHEL DECHY (dechy ĈE lve-esperanto.com) |
Norda Francio,
22 Maj 2007 |
|
| Mi subtenas
vian kandidatecon, via programo estas klara kaj interesa.
| Dankon,
kara amiko Michel ! Via vorto tuŝas min.
|
|
| 2.
JORGOS (jorgos ĈE tiscali.fr) |
23 Maj 2007 |
|
| Saluton !
Kvankam ne tute adekvata loko por prezenti tiun opinion...
Mi proponas, ke ankaŭ t.n. « G.E.E. » (en Eo :
Grupo de Francaj aŭ Franciaj Esperanto Instruantoj) fariĝu
komuna al U.F.E. kaj S.A.T.-Amikaro. Tion ne malpermesas I.L.E.I.
kaj el tio gajnos kaj t.n. « G.E.E. » kaj F.E.I.
kaj evidente la tuta E-movado en Francio kaj en la mondo.
Ĉu mi ne pravas ? Samideane via (ĉi-jare membro de
nek U.F.E. – kvankam ja nerekta tra unu regiona federacio,
pro E-departementa prezidanteco sed ne taŭga reprezentanto
pro loĝeco en alia regiono – nek S.A.T.-Amikaro, tamen plu
instruadanta E-on en tri-kvar kursoj) Js.
|
|
