Ĉu
UFE Bone Plenumas sian Taskon ?
— Reago al Publika Letero de André Frangeul —
Fine de Februaro 2007 mi ricevis publikan leteron de s-ro André
Frangeul, kiu estas sekretario de la Franca Centrokcidenta Esperanto-Federacio
kaj prezidanto de la Anĝeva
Esperanto-Asocio. Lia letero de la 15a de Februaro 2007 temas « Pri
Espéranto-France* : ĉu nia nacia Esperanto-asocio
bone plenumas sian taskon ? »
>>
Legu la tutan publikan leteron de André Frangeul <<
Unue mi dankas kaj gratulas al André Frangeul pro lia esprimo,
ĉar laŭ mi ĉiu debato ebligas konsciigi kaj pripensigi
nin pri iuj demandoj kaj iel progresigi nian aferon. Krome kiel
federacia prezidanto mi ĉiam ŝatas, ke aliaj federaciestroj
vortigas siajn pensojn pri nia landa Esperanto-movado. Tio kontribuas
al ĝenerala, interregiona, tutlanda diskuto, kiu nur bona povas
esti.
Konforme al lia peto fine de la letero, mi jene respondu al li
kaj esprimu miajn opiniojn pri liaj menciitaj temoj : membriĝoj
al UFE, neceso de 1° ĉiujara kampanjo far UFE, 2° rebatservo
kaj komunikado de UFE, 3° komitato de la Esperanto-amikoj kaj
4° subteno al la staĝaj Esperanto-centroj.
* Espéranto-France : franca nomo de la Unuiĝo
Franca por Esperanto (UFE).
| |
| >
Individuaj membriĝoj al la landa asocio |
André Frangeul skribis : « El la lokaj
esperanto-centroj, multaj aktivaj esperantistoj ne sentas la bezonon
aliĝi al nacia organizaĵo kaj tiel kontribui al la progresoj
de Esperanto naciskale. [...] Kial aliĝi al asocio, kiu [...]
ŝajnas [...] tute inerta ? »
Estas prave, ke ni lokaskale tre ofte renkontas tiun inklinon ne
membriĝi al la landa asocio. Bedaŭrinde, ĉar landaj membriĝoj farus
UFE'n pli ampleksa kaj konsiderinda laŭ rigardo de eksteruloj kaj
oficialuloj. Kaj bedaŭrinde, ĉar UFE kaj ĝiaj diversaj instancoj
ja agas sur pluraj landaj kampoj : komunikado kaj informado
(retejoj, revuo, varbiloj, budaj kakemonoj, ktp.), rilatoj al politikularo
kaj al neesperantistaj instancoj aŭ asocioj, helpo al larĝskalaj
aranĝoj...
Problemo kuŝas en la maltroa diskonigo de tiuj faroj ;
sekve oni miskonkludas, ke nenio fariĝas lande. Mi rimarkigu,
ke tiajn rimarkojn pluraj faras ankaŭ pri federacioj. Sed tion
ni neniam aŭdas pri kluboj. Tute simple ĉar la surlokaj
agadoj de la kluboj estas tuj videblaj de ĉiuj : kursoj,
prelegoj, ekspozicioj, budoj, ktp. Tiuj regulaj agadoj konsistigas
la agosferon de la kluboj, kaj estas la plej facile konstateblaj
pro la surlokeco.
Sed oni ne postulu, ke la federacioj kaj UFE agu same kiel la kluboj.
Al ĉiu asocia tavolo respondas specifa agosfero ! La kluboj
zorgas pri surlokaj aferoj. Sed siaflanke UFE zorgas pri tutlanda
kunordigado kaj pri specife landaj aferoj (rilatoj al ministrejo,
al landaj neesperantistaj asocioj, francaj varbiloj...). Dum la
federacioj estas perantoj inter la kluboj kaj UFE, kunordigas lokajn
agadojn kaj zorgas pri regionskalaj aferoj (ekz. regionaj ekzamensesioj).
Kaj evidente kampanjoj al politikularo, eldono de varbiloj kaj
informiloj, monhelpo al aranĝoj aŭ kursoj... ne estas
tiel videblaj kaj konataj kiel la klubaj agadoj. Sed nekonateco
neniel estas nefarateco. Ĉiuj asocioj agas kaj strebas je ĉiuj
teritoriaj tavoloj kaj en siaj respektivaj agosferoj, kaj ĉiuj
bezonas membrojn por plu vivi kaj plu agadi. Tial estas vere dezirinde,
ke la homoj unue pli interesiĝu pri la regionaj kaj landaj
faroj kaj due partoprenu per membriĝo kaj eĉ aktivado !
| |
| >
Ĉiujara tutlanda kampanjo al specifa publiko |
André Frangeul skribis : « Ĉiujare,
en septembro–oktobro, Esperanto-France impulsu nacie kampanjon
por la informado en definita medio : edukistoj, studentoj,
universitatoj, liceoj, turismo, gazetaro, ktp. »
La ideo kompreneble bonas ! Informaj kampanjoj ja necesas
en ĉiuj medioj kaj tavoloj de nia socio. Kaj tia naciskala
kampanjo koncentrita sur unu aparta medio ŝajnas tre interesa.
Adresi sin al unu specifa publiko dum momento de la jaro kaj tra
la tuta Francio povus havi pli grandan eĥon ĉe tiu publiko.
La problemo estas la homfortoj. Necesus tutlandaj kunordigado,
konsilado kaj kunfarado... kio ne plej facilas. Kaj necesus ankaŭ
la plena partopreno de ĉiuj federacioj por realigi la kampanjon
siaregione. Sed bedaŭrinde oni konstatas, ke nur malmultaj
federacioj tiel agis kune kun UFE kadre de la ĝisnunaj tutlandaj
kampanjoj. Jen pro manko de volo, jen pro manko de homfortoj, jen
pro manko de scio... Estu unuflanke atenta kunordigado kaj helpo
far UFE kaj aliflanke pretiĝo de la federacioj kaj kluboj.
André Frangeul skribis : « Kelkafoje,
aperas (ĉefe en la nacia gazetaro) aŭ estas aŭdataj en televido,
stultaj asertoj pri esperanto. Esperantistoj ofte bone reagas, ĉefe
per Internet, sed estus dezirinde ke Esperanto-France “oficiale”
intervenu. »
Sinjoro Frangeul denove pravas pri la neceso de landa rebatservo
en UFE por reagi pri landaj gazetartikoloj kaj televidelsendoj.
Ankaŭ en ĉiu federacio necesus rebatservo por reagi pri
regionaj gazetartikoloj. Tie kuŝas du problemoj. Unue, refoje
la manko de homfortoj : rebati postulas tempon kaj energion.
Due, la ofta manko de kompetento : rebati ja postulas ankaŭ
kapablon trafe kaj dece kontraŭargumenti, kio ne estas facila
afero.
Tial necesas formadoj, preparadoj pri rebatado. Ekzemple, estus
profite por ĉiuj, ke UFE organizu seminariojn pri rebatado,
same kiel GEE* lastatempe organizis seminarion pri instruado. Kaj
nepre estu konsiloj kaj direktivoj de UFE pri argumentado, por ke
la diversaj rebatoj (landaj, regionaj kaj lokaj) fariĝu en
homogeno. Ĉar tro ofte oni konstatas disajn, individuajn reagojn,
kiuj fuŝargumentas kaj eĉ povas malutili. Resume, necesas
kompetento kaj homogeno — al tio ni strebu.
* GEE : Groupe des enseignants espérantophones,
asocio de la francaj Esperanto-instruantoj.
| |
| >
Komunikado : varbiloj, informiloj kaj bulteno |
André Frangeul skribis : « Ni
notu pozitivajn punktojn : [...] panelojn [...]
faldfolion [...] DVD [...]. [...] La revuo
“Le Monde de l'Esperanto” estas bela dulingva gazeto [...].
Ĝi devus aperi pli regule kaj iom pli ofte. La monata bulteno
“Okazas” ankaŭ mankas al ni. »
Pri la eldonataj varbiloj kaj informiloj ni povas nur konsenti.
Vere okazis tre granda progreso de la Esperanto-varbiloj danke al
la novaj teknikoj kaj al la kompetentoj de la responsuloj aŭ
komisiitoj de UFE kaj aliaj. Same pri la franca revuo Le Monde
de l'espéranto, kiu ja suferas malakuratemon sed estas
bela, agrabla kaj montrinda. Pri la ofteco : idealo estus ĉiumonata
eldono de la revuo, sed tio ne eblas pro (denove) la manko de homfortoj
kaj verŝajne ankaŭ la kosto por la asocio ; la nuna
principa eldonofteco taŭgas laŭ mi.
Sinjoro Frangeul mencias la informilon Okazas, kiu trapasis
reformon en 2006. Ĝi celas informi pri la intaj kaj ontaj okazaĵoj
en la regionaj kaj lokaj Esperanto-movadoj, kio ebligas diskonigon
de siaj agadoj kaj ekscion pri tiuj de la aliaj kluboj. Antaŭe
ĝi aperis aparte de Le Monde de l'espéranto,
kvarpaĝe kaj ĉiumonate. Hodiaŭ ĝi aperas kun
kaj en Le Monde de l'espéranto, do malpli ofte. La
nova formo pli belas, tamen ankaŭ mi preferus retrovi antaŭajn
karakterizojn de Okazas — precipe la oftecon.
Ĉar nuntempe estas malpli facile aperigi siajn informojn en
la informilo. Tion kaŭzas du faktoj. Unue, la loko dediĉita
al la klubaj informoj estas iomete malpli vasta ol antaŭe :
aldoniĝis en la informilo plenpaĝa artikolo por konsili
aktivulojn (ĉiam tre interesa) kaj la internacia kalendaro.
Due, la informilo eldoniĝas ja malpli ofte. Tiel ke, de la
malnova stato al la nova, la nombro da lokaj informoj duoniĝis
(eĉ iom pli).
Sekve mi sugestus la jenon : ree eldoni la informilon Okazas
aparte de Le Monde de l'espéranto kaj ĉiumonate.
Povus problemi la ĉiumonata verko de plenpaĝa artikolo
por konsilado : tiun artikolon oni povus meti en Le Monde
de l'espéranto apud la aliaj artikoloj. Estas vera deziro
de la kluboj kaj federacioj diskonigi siajn agadojn tra la lando.
Ni devus diskuti pri la afero kaj la diversaj ebloj.
| |
| >
Komitato de la Esperanto-amikoj |
André Frangeul skribis : « Ni
vere bezonus en Francio, komitaton de amikoj de esperanto, kiu kunigus
konatajn personojn de la politika, arta, ĵurnalista, scienca, edukatista
medioj ! »
Pri tiu ideo mi pli skeptikas. Kompreneble la ideo estas bona.
Sed praktike, kiel starigi kaj konsistigi tian komitaton ?
kiel vivteni ĝin ? La afero meritas pripenson kaj diskuton.
| |
| >
Subteno al la staĝaj Esperanto-centroj |
André Frangeul skribis : « Estus
bone se Esperanto-France, en tuta kunlaborado pli aktive kun la
aliaj naciaj esperantaj organizaĵoj, konsiderus tre serioze la gravecon
de niaj studaj instalaĵoj kiel Grésillon kaj Bouresse, por vivteni
ilin kaj ampleksigi ilian rolon. »
Pri tiu afero mi ne sufiĉe scias kaj konsekvence ne kompetentas.
Mi fakte konscias, ke malmulton mi scias pri la Esperanto-centroj
en Grésillon, Bouresse k.a. Kiel ili organiziĝas ?
kiuj bezonoj estas iliaj ? kiel kaj por kio ampleksigi ilian
rolon ? Kulturaj kaj studaj centroj ja gravas. Necesas informiĝi
kaj diskuti pri tio.
Ĉu nia landa Esperanto-asocio bone plenumas sian taskon ?
Certe estas mankoj, precipe homfortaj, ankaŭ komunikaj kaj
rilataj. Certe estu plibonigoj, ekzemple pri rebatado, informado
kaj kunordigado. Sed estas ankaŭ rimarkindaj faroj, inkluzive
la revuon kaj la varbilojn.
Ĉu UFE kontentige agadas ? Vere, ni rigardu al ĉiuj
asocioj, landa, regionaj kaj lokaj. Ĉar neniu tavolo povas
sola progresigi Esperanton ; ĉiu tavolo kaj agadu siaflanke
kaj kunagadu kun la ceteraj du tavoloj. Tio estas nepra neceso.
Sinjoro Frangeul petas, ke UFE estu pli atakema (« ofensivema »)
en la defendo kaj konigo de Esperanto. Por esti pli efikaj kaj progresigi
Esperanton, niaj asociaj tavoloj pli regule interrilatu, pli intime
kunlaboru, kaj pli homogene agadu. Tiel ni igos nian tutlandan movadon
pli fortika. Tiel ĉiuj ni pli efike plenumos niajn taskojn. 
Vidu la artikolon en PDF-versio
 |
| |
| 1.
MARC ANSELMI (marcjoantom ĈE free.fr) |
Norda Francio,
24 Mar 2007 |
|
|
Xavier, ĉu vi volas diri ke UFE ne plenumas sian taskon ? Mia penso :
nia movado estas eta movado. Ĉiuj agas kiel ili povas.
Se vi volas devigi samideanojn enskribiĝi, labori en
« oficialaj » komitatoj, estraroj...
tio ne estas la bona solvo.
| Neniel
kaj neniam mi asertis, ke UFE ne plenumas sian taskon
kaj estas inerta. Legu mian plenan artikolon en mia
persona retejo, kaj vi konstatos, ke mi diras, ke ja
estas mankoj kaj necesaj plibonigoj, sed UFE malgraŭe
jam efikas sur pluraj kampoj : komunikiloj, informado,
rilatoj al instancoj, subteno al aranĝoj... André
Frangeul starigis la demandon, kaj mi esprimis mian
respondon, kiu tute ne estas nea.
Vi krome bedaŭrinde miskomprenis miajn vortojn :
mi neniel volas truddevigi la homojn membriĝi al
asocioj aŭ komitatoj ! Asociado estas volontado.
Mi esprimis nur mian bedaŭron, ke oni ofte ne konscias
aŭ neglektas la malpli videblajn agadojn de la
federacioj kaj de UFE. André Frangeul ĝuste
diris, ke pro tia nescio aŭ neglekto homoj taksas
tiujn asociojn neniofarantaj kaj sekve ne komprenas
la intereson membriĝi. Mi simple invitas la homojn
konscii pri la aktiveco de tiuj asocioj (dum ankaŭ
tiuj asocioj sufiĉe komuniku pri siaj faroj !)
kaj simple kuraĝigas al (laŭvola) membriĝo.
Mi esperas, ke per tiu respondo al via reago mi nun
pli bone komprenigis mian esprimon al vi. Ĉiuokaze
mi tre dankas al vi pro via reago kaj via kontribuo
al la diskuto. |
|
|
| Oni iun
lundon vizitu la UFE-sidejon, por konstati kiom da laboro
farendas kaj faratas : pritrakti la amason da ricevitaj sendaĵoj
(mendoj, aliĝoj, abonoj, informpetoj, ktp.), mendi la mankantajn
varojn ĉe UEA (aŭ aliloke), rekontakti la mendantojn, kiuj
eraris (tio nekredeble ofte okazas), prepari sendaĵojn (pakaĵojn...),
porti ilin al la poŝtejo (kaj inverse preni tie atendantajn
sendaĵojn), akcepti vizitantojn, kiuj simile petas multajn
aferojn (deziras aboni, aliĝi, informojn, ktp.), ordigi la
malordon postlasitan de vizitantoj (sed ne nur : ankaŭ de
regulaj uzantoj), ktp. kaj mil-ktp. Jes ja, UFE devus ĉiumonate
eldoni sian belegan revuon... sed ĉu oni imagas kiom da tempo
necesas por fari tion (parenteze dankegon al la farantoj por
la profesia aspekto de la revuo) ? Jes ja, la UFE-sidejanoj,
kiuj BONVOLE laboras en la sidejo, do en Parizo mem, devus
regule kaj amase kontakti diversajn politikistojn, respondeculojn,
televid-entreprenojn, ktp. sed ĉu oni imagas, kiom da tempo
kaj profesieco necesas por tio ? ktp. ktp. (plurfoje tion mi jam mem diris al s-ro Frangeul).
|
| 3.
JEAN HENNEBERT (jm.nbr ĈE free.fr) |
Norda Francio,
30 Mar 2007 |
|
| Ĉar mi
ne kuraĝas tralegi la diversajn statutojn, mi hezite starigas
naivan demandon koncerne la membriĝon al UFE. Ŝajnas al
mi, ke kiam oni aliĝas lokan asocion, oni aŭtomate aliĝas
ankaŭ al regiona federacio. Nu, se ĉiuj federacianoj aŭtomate
membriĝus al UFE, ties membraro ege plivastiĝus. Tiam, eĉ
kun duonigitaj kotizoj, UFE verŝajne pliriĉiĝus, kaj povus
agadi pli efike...
| Vi pravas. Ĝuste tiun proponon faris s-ino Jeanne-Marie Cash (prezidantino de la Sudopirinea Esperanto- Federacio) en UFE, kaj ĝin mi subtenas. Tiu tiel nomata « kupola kotizo » (unu kotizo por membri en la trinivelaj asocioj) necesigas kompletan reformon de la kotizosistemoj. Jam okazis laborkunvenoj pri tio, sed bedaŭrinde el la debatoj rezultis nenio konkreta ĝis nun. Ekzistas multaj problemoj teknikaj kaj volaj. |
|
|
